|
Промените кои ги донесе процесот на децентрализација во Македонија овозможи повторно зголемување на можностите за работа на урбаните заедници. Како резултат на овие промени и можности кои ги нуди процесот на децентрализација, како и искуството од реактивирањето на урбаните заедници во Прилеп, произлезе идејата за реализација на овој проект.
Проектот има за цел да се реактивират урбаните заедници во Кичево како единствен модел кој ќе ги здружи граѓаните заедно и ќе им биде дадена можност за целосно граѓанско вклучување во процесите на одлучување на локално ниво. Водејќи се од искуството кое Центарот за граѓанска иницијатива(ЦГИ) го доби со реализацијата на проектот за градење на капацитетте на урбаните заедници од Прилеп, преку овој проект ќе им се овозможи на граѓаните од Кичево активно граѓанско учество во процесите на одлучување, а воедно преку пренесување на позитивни искуства од Прилеп на Центарот за одржлив развој на заедницата од Кичево ќе се овозможи подобрување на соработката помеѓу урбаните заедници и Локалната самоуправа.
Во Кичево постојат 17 месни заедници, од кои 11 урбани заедници и 6 рурални заедници. Во сите месни заедници може да се забележи дека најчесто проблемите се од инфраструктурен карактер, но исто така постојат и други проблеми како: нефункционалност на раководствата на месните заедници, постоење на стари раководства – повеќе од 10 години, многу ретко или воопшто не се одржуваат состаноци на Управен одбор, за кои состаноци не постои интерес, слаб интерес кај граѓаните за активности во рамките на својата месна заедница, ниту една месна заедница нема свои простории, од 17 месни заедници, само една месна заедница има активна жиро сметка, сите месни заедници се соочуваат со проблеми како што се: невработеност, инфраструктура и сл.
Претставниците на урбаните зедници од Кичево посочија дека главен проблем за нефункционирањето на урбаните зедници е немање на добра организираност од страна на граѓаните, а исто така сметаат деканајголем проблем е непостоењето на одзив и интерес од страна на локалната самоуправа за соработка со урбаните заедници.
На самиот почеток на реализација на проектните активности претставник на ЦГИ одржа средба – иницијален состанок со претставници од урбаните заедници од Кичево и претставник на Центарот за одржлив развој на заедницата од Кичево, заради пренесување на позитивни искуства од рективирањето на урбаните заедници од Прилеп, за реактивирање на урбаните заедници во Кичево. Граѓанското вклучување во овој процес беше круцијално за планирање на идните чекори во работата со урбаните заедници, па врз основа на информациите кои беа добиени од страна на претставниците на урбаните заедници, беше направен извештај за работата и функционирањето на урбаните заедници во Кичево.
Заради успешна реализација на проектот се отиде чекор понапред кон активирање на граѓаните во нивната заедница, преку одржување на пет работилници за пренесување на искуства од работата на урбаните заедници од Прилеп, за реактивирање на урбаните заедници од Кичево. Заради јакнење на капацитетите на урбаните заедници формирано е Координативното тело, со цел да се овозможи воспоставување на цврста врска – партнерство помеѓу претставниците на урбаните заедници и Локалната самоуправа.
Со цел да се овозможи промовирање на проектот, а со тоа и зголемување на интересот кај граѓаните за нивно активно учество во процесите на донесување на одлуки на локално ниво, беа подготвени и дистибуирани печатени материјали. Материјалите беа дистрибуирани на отворените форуми за граѓаните на урбаните заедници, во самите урбани заедници, како и во најфреквентните делови од градот Кичево.
Иницијативите кои беа превземени во урбаните заедници се покажаа како позитивен пример, докажувајќи дека граѓанското движење е носечка сила за развојот на заедницата. Преку реализацијата на овој проект се овозможува поддршка на работата на урбаните заедници како уникатен модел, кој ќе ги здружи граѓаните заедно и ќе ги поттикне на поголема активност во решавање на заедничките проблеми во заедницата и нивни ангажман во процесот на донесување на одлуки на локално ниво.
Проектот се реализира во периодот 01.10.2007 – 30.09.2008, а финансиер на овој проект е German Marshal Fund,програма на Balkan Trust for Democracy
 
|
